மதுரை, செப்.29-
மதுரை மீனாட்சி அம்மன் கோவில் தொடர்பான நிகழ்வின் பின்னணியில், இந்து சமய அறநிலையத்துறை அமைச்சர் ரமேஷ் வெளியிட்டுள்ள சமூக வலைதளப் பதிவு தற்போது சர்ச்சையை ஏற்படுத்தியுள்ளது.
அமைச்சர் ரமேஷ், முதலமைச்சர் விஜய்யுடன் இருக்கும் புகைப்படத்தை பதிவிட்டு, அதற்கு “அழகருடன்” என குறிப்பிட்டுள்ளதாக கூறப்படுகிறது.
பொதுவாக மதுரை என்றாலே பக்தர்களின் நினைவுக்கு முதலில் வருவது மீனாட்சி அம்மன்–சுந்தரேஸ்வரர் திருக்கோவிலும், சித்திரைத் திருவிழாவில் முக்கிய இடம் பெறும் கள்ளழகர் வழிபாடும் ஆகும். இத்தகைய ஆன்மிகப் பின்னணி கொண்ட மதுரையில், முதலமைச்சர் விஜய்யை “அழகர்” என அமைச்சர் ரமேஷ் குறிப்பிட்டிருப்பது தான் தற்போது விவாதப் பொருளாகியுள்ளது.
குறிப்பாக, இந்து சமய அறநிலையத்துறையின் அமைச்சராக இருக்கும் ஒருவர், மதுரையின் மிக முக்கியமான திருக்கோவில் நிகழ்வை ஒட்டிய பதிவில், அரசியல் தலைவர் ஒருவரை “அழகர்” என வர்ணித்திருப்பது சரியானதா? என்ற கேள்வியை சிலர் எழுப்பி வருகின்றனர்.
முதலமைச்சர் விஜய்யை புகழ்ந்து கூறுவதற்காகவே “அழகர்” என்ற வார்த்தை பயன்படுத்தப்பட்டதா? அல்லது மதுரையின் ஆன்மிக அடையாளத்துடன் தொடர்புபடுத்தும் வகையில் அந்த வார்த்தை பயன்படுத்தப்பட்டதா? என்ற விவாதமும் சமூக வலைதளங்களில் உருவாகியுள்ளது.
ஒரு புறம், அரசியல் தலைவர்களைப் பாராட்டும் வகையில் இதுபோன்ற அடைமொழிகளை பயன்படுத்துவது வழக்கமான ஒன்றுதான் என்ற கருத்தும் இருக்கிறது. மறுபுறம், கோவில் நிர்வாகத்தை கவனிக்கும் இந்து சமய அறநிலையத்துறை அமைச்சரே, திருக்கோவில் நிகழ்வின் பின்னணியில் முதலமைச்சரை “அழகர்” என குறிப்பிட்டிருப்பது தேவையற்ற சர்ச்சைக்கு வழிவகுக்கும் என விமர்சனங்களும் எழுந்துள்ளன.
மீனாட்சி அம்மன் கோவில் கும்பாபிஷேகம் உள்ளிட்ட முக்கிய ஆன்மிக நிகழ்வுகள் நடைபெற்றுள்ள நிலையில், அதனுடன் தொடர்புடைய அமைச்சரின் சமூக வலைதளப் பதிவில் இடம்பெற்றுள்ள ஒரே ஒரு வார்த்தை தற்போது அரசியல் மற்றும் சமூக வலைதள விவாதத்திற்கு காரணமாகியுள்ளது.
“அழகர்” என்பது தெய்வத்தின் பெயர் என்ற பக்தி உணர்வு கொண்ட சூழலில், முதலமைச்சர் விஜய்யை அந்த பெயரில் அமைச்சர் குறிப்பிட்டது ஏன்? என்பதே தற்போது எழுந்துள்ள முக்கிய கேள்வியாக உள்ளது.
ஏற்கனவே எழுந்துள்ள சர்ச்சை
தேர்தல் பிரச்சார களத்தில் முதல்வர் விஜய் ஓம் சக்தி பராசக்தி என தொடர்ந்து குறிப்பிடுவதும் உதயநிதி ஸ்டாலின் ஓம் காளி ஜெய் காளி என குறிப்பிடுவதற்கும் பல்வேறு தரப்பினர் எதிர்ப்பு தெரிவித்து வருகிற சூழ்நிலையில் தற்போது புதிய சர்ச்சை ஏற்பட்டுள்ளது.
.jpeg)
