.jpeg)
2026 அக்டோபர் மாதம் திரைக்கு வந்துள்ள 'பருந்து' திரைப்படம், வழக்கமான தமிழ் சினிமா காதல் கதைகளிலிருந்து மாறுபட்டு, கிராமத்துப் பின்னணியில் குடும்பக் கௌரவம், பருவ ஈர்ப்பு மற்றும் கல்வியின் முக்கியத்துவத்தை வலியுறுத்தும் ஒரு சமூக விழிப்புணர்வுச் செய்தித் திரைப்படமாக கவனம் பெற்றுள்ளது.
'நண்பனின் மகள் தன் மகளைப் போல...' – அழகுமலையின் கம்பீர அடியெடுத்து வைப்பு!
கிராமத்து மண்வாசனையும் சமூகப் பொறுப்பும் நிறைந்த இத்திரைப்படத்தை ஆர்ஆர் பிக்சர்ஸ் (RR Pictures) சார்பில் எழுதி, இயக்கி, தயாரித்து, முக்கியக் கதாபாத்திரத்திலும் நடித்துள்ளார் ஆர். அழகுமலை.
திரையில் ஊர்த் தலைவராக வரும் அழகுமலை, மகள் ஓடிப்போன துயரத்தில் தவிக்கும் தன் நண்பன் மாரிமுத்துவிடம், "நண்பனின் மகள் தன் மகளைப் போல..." என்ற நோக்கில் ஆறுதல் கூறி, அந்தப் பெண்ணை மீட்டு வர வாக்கு கொடுக்கும் வசனத்திலும் உணர்ச்சிகரமான நடிப்பிலும் பருந்தை விட அதிகம் உயரம் தொடுகிறார் அறிமுக இயக்குனரும் நடிகருமான ஆர்ஆர் பிக்சர்ஸ் உரிமையாளர் அழகுமலை. நிஜ வாழ்க்கைப் பக்குவத்தையும் கம்பீரமான உடல் மொழியையும் வெளிப்படுத்தி ஒட்டுமொத்தத் திரைப்படத்தையும் தன் தோளில் சுமந்து சென்றுள்ளார்.
குடும்பக் கௌரவமும் தேடுதல் வேட்டையும்: கதையின் சுருக்கம்
மதுரை அருகேயுள்ள ஒரு கிராமத்தில், மாரிமுத்து – சர்மிளா தம்பதியினரின் மூத்த மகளுக்குத் திருமண ஏற்பாடுகள் மிக விமரிசையாக நடந்து வருகின்றன. இந்தச் சூழலில், பள்ளியில் படித்து வகுப்பில் முதல் மதிப்பெண் எடுக்கும் திறமைசாலியான இளைய மகள் உமா, அறியாத வயதில் ஏற்பட்ட ஈர்ப்பால் தன் வீட்டில் கார் ஓட்டுநராக வேலை செய்யும் மூர்த்தியுடன் திடீரென வீட்டை விட்டு ஓடிப்போகிறாள்.
இதனால் குடும்பத்தின் கௌரவத்திற்கு இழுக்கு ஏற்பட்டு, மூத்த மகளின் திருமணம் நின்றுவிடுமோ என்ற அச்சத்தில் தந்தை மாரிமுத்து நிலைதடுக்காடுகிறார். அவர் தனது நண்பரும் ஊர்த் தலைவருமான அழகுமலையின் உதவியை நாடுகிறார்.
ஊர்த் தலைவர் அழகுமலை, தன் தம்பி விநாயக் மற்றும் அவருடைய காதலியும் பெண் காவல் அதிகாரியுமான ஷர்மிஷா ஆகியோரின் உதவியுடன் ஓடிப்போன காதல் ஜோடியைக் கண்டுபிடித்து, இரு குடும்பங்களுக்கும் பாதிப்பின்றிச் சுமூகமான தீர்வு காணத் தேடுதல் வேட்டையில் இறங்குகிறார்.
மறுபுறம், பெண்ணின் தாய்மாமனான மன்சூர் அலிகான் காதலனை வெட்டுவதற்காக ஆத்திரத்துடன் அலைகிறான். இதற்கிடையில், இந்த ஜோடியை மறைத்து வைக்கும் ஆட்டோ ஓட்டுநர் சென்றாயன் தவறான ஆலோசனைகளை வழங்க, வழக்கறிஞராக வரும் இயக்குநர் பேரரசு நியாயத்தின் பக்கம் நிற்கிறார். இந்தச் சிக்கல்களுக்கு மத்தியில், அந்த இளஞ்சோடி என்ன ஆனார்கள் என்பதே படத்தின் உணர்ச்சிப்பூர்வமான மீதிக்கதையாகும்.
நட்சத்திரங்களின் எதார்த்த பங்களிப்பு
- ஆர். அழகுமலை (ஊர்த் தலைவர்): பொறுப்புள்ள முதிர்ச்சியான நடிப்பால் கதையின் மைய அச்சாணியாக விளங்குகிறார்.
- வி.ஆர். விநாயக்: ஊர்த் தலைவரின் தம்பியாக வந்து, துடிப்பான இளமைத் துள்ளலோடும் அதிரடிச் சண்டைக் காட்சிகளோடும் விறுவிறுப்பைக் கூட்டுகிறார்.
- ஷர்மிஷா: காதலியாகவும் துணிச்சலான காவல் அதிகாரியாகவும் இரு பரிமாணங்களில் கதையோட்டத்திற்குப் பலம் சேர்க்கிறார்.
- ஜி. மாரிமுத்து: மகள் ஓடிப்போனதால் நிலைகுலைந்து தவிக்கும் தந்தை பாத்திரத்தில் தனது அனுபவமிக்க நெகிழ்ச்சியான நடிப்பைப் பதிவு செய்துள்ளார்.
- மன்சூர் அலிகான்: காதலனைப் பழிவாங்கத் துடிக்கும் தாய்மாமனாகத் தனது வழக்கமான மிரட்டலான பாணியில் மிரட்டியுள்ளார்.
- இயக்குநர் பேரரசு: வழக்கறிஞராக வந்து சூழ்நிலையைப் புரிந்து கொண்டு நியாயத்தின் பக்கம் நின்று கெத்து காட்டுகிறார்.
- சென்றாயன் & அப்புக்குட்டி: தவறான ஆலோசனை தரும் நபராக சென்றாயனும், கவுன்சிலராக அப்புக்குட்டியும் நகைச்சுவைச் சேர்க்கிறார்கள்.
தொழில்நுடபக் குழுவின் பலம்
காசி விஸ்வநாதனின் ஒளிப்பதிவில் மதுரையின் கிராமப்புற அழகும், வயல்வெளிகளின் பசுமையும், ஆக்ஷன் காட்சிகளின் விறுவிறுப்பும் இயல்பாகப் பதிவு செய்யப்பட்டுள்ளன. ஜேம்ஸ் ரூபர்ட்டின் இசையில் கிராமிய மணம் கமழும் பாடல்களும் பின்னணி இசையும் படத்தின் ஆன்மாவை மீட்டிச் செல்கின்றன. ஜெயகிருஷ்ணாவின் படத்தொகுப்பு காட்சிகளைத் தொய்வின்றி நகர்த்த உதவுகிறது. படத்தின் மக்கள் தொடர்பாளராக (PRO) விஜயமுரளி பணியாற்றியுள்ளார்.
வன்முறையற்ற கிளைமாக்ஸ் – ஒரு சமூக அருமருந்து!
சாதிவெறி, வெட்டுக்குத்து அல்லது ஆணவக் கொலை என்ற ரத்தச் சகதியில்லாமல், எதார்த்தமான தீர்வுடன் கூடிய வித்தியாசமான கிளைமாக்ஸை அமைத்திருப்பது 'பருந்து' திரைப்படத்தின் தனித்துவமாகப் போற்றப்படுகிறது.
பருவ வயதில் ஏற்படும் தற்காலிக ஈர்ப்பையும், வாழ்க்கையின் பக்குவம் நிறைந்த உண்மையான காதலையும் பிரித்தறிய வேண்டியதன் அவசியத்தையும், பள்ளிப் பருவத்தில் படிப்பிற்கு முன்னுரிமை அளிக்க வேண்டும் என்பதையும் உணர்த்தி, அறியாத வயதில் பூக்கும் காதலால் குடும்பங்கள் சந்திக்கும் சவால்களுக்கு எதார்த்தமான தீர்வை வழங்கி சமூகப் பொறுப்புடன் உயரே பறக்கிறது இந்த 'பருந்து'!
குடும்பத்துடன்குடும்பத்துடன் பார்க்க வேண்டிய அருமருந்து
ஊராட்சி மன்ற தலைவராக யா. புதுப்பட்டி மக்களின் மனங்களில் இடம்பெற்ற அழகுமலை அவர்கள் அறிமுக இயக்குனராகவும் நடிகராகவும் மிகச் சிறப்பான பாடல் ஆசிரியராகவும் கங்கை அமரன் அவர்களுடன் இணைந்து திரை பதித்திருப்பது மீண்டும் மதுரையின் கிராமத்தை சினிமா என்ற செல்லுலாயுடுக்குள் கொண்டு சேர்த்து இருக்கிறது..
வாழ்த்துகள் பருந்து திரைக்குழுவினருக்கு!
.jpeg)
