டெல்லியில் காற்று மாசுப் பிரச்சினை அதிக அளவில் நிலவி வருகிறது. இதனால் பொதுமக்கள் சுவாசப் பிரச்சினை உள்ளிட்ட பல்வேறு வியாதிகளுக்கு ஆளாகின்றனர். இதற்கு மத்தியில் பாராளுமன்ற குளிர்காலக் கூட்டத் தொடர் கடந்த திங்கள்கிழமை தொடங்கி நடைபெற்று வருகிறது. இந்நிலையில், டெல்லியில் காற்று மாசுப் பிரச்சினையை கட்டுப்படுத்த மத்திய அரசு நடவடிக்கை எடுக்கக் கோரி பாராளுமன்றத்துக்கு எதிர்க்கட்சித் தலைவர்கள் காஸ் முகக்கவசத்துடன் வந்தனர்.
இதைத் தொடர்ந்து, டெல்லியில் நிலவும் காற்று மாசு குறித்து விவாதம் நடத்த காங்கிரஸ் பாராளுமன்றத்தில் நோட்டீஸ் அளித்துள்ளது. அவை நடவடிக்கைகள் அனைத்தையும் ஒத்திவைத்து விட்டு, டெல்லி காற்று மாசு குறித்து விவாதம் நடத்த வேண்டும் என்று சண்டிகர் மக்களவை எம்.பி., மணீஷ் திவாரி, ஒத்திவைப்பு தீர்மான நோட்டீஸ் அளித்துள்ளார்.
